O‘zbekistonda “President Tech Award” tanlovining muhim bosqichi — loyihalarni onlayn baholash jarayoni start oldi. Bu yilgi tanlov rekord darajadagi ishtirokchilarni jalb etdi: mamlakatning barcha hududlaridan 5 561 nafar kishi.

 

Kimlar ishtirok etmoqda

Tanlovda maktab o‘quvchilari, talabalar va yosh tadbirkorlar qatnashmoqda. Eng ishtirokchi atigi 14 yoshda, eng kattasi esa 30 yoshda. Tanlov ishtirokchilarining o‘rtacha yoshi — 22.

Umumiy hisobda 869 ta jamoa ro‘yxatdan o‘tgan bo‘lib, ulardan 793 tasi ishtirokini tasdiqlagan. Arizalar soni bo‘yicha Toshkent shahri yetakchilik qilmoqda — 2 096 ishtirokchi va 574 jamoa. Keyingi o‘rinlarda esa Farg‘ona va Toshkent viloyatlari — har birida 464 ishtirokchi.

 

Qanday g‘oyalar taqdim etildi

Loyihalar mavzusi IT sohasidagi eng dolzarb yo‘nalishlarni qamrab olgan:

• ijtimoiy soha uchun raqamli yechimlar;

• sun’iy intellekt asosidagi xizmatlar;

• Micro-SaaS va AdTech;

• fintech va tadbirkorlik,

• kompyuter va mobil o‘yinlar.

Alohida qiziqish uyg‘otayotgan maxsus yo‘nalish — hakaton bo‘lib, unda 177 jamoa ishtirok etmoqda.

 

Hozirgi jarayon

Onlayn baholash bosqichida ekspertlar loyihalarni to‘rtta asosiy mezon bo‘yicha tekshirmoqda: mahsulot, salohiyat, biznes modeli va jamoa. Natijalar asosida eng kuchli loyihalar tanlab olinib, final sari yo‘lni davom ettiradi.

 

Nega bu muhim

“President Tech Award” mamlakatda yosh iste’dodlarni aniqlash va innovatsion g‘oyalarni qo‘llab-quvvatlash uchun asosiy maydonlardan biri bo‘lib qolmoqda. Ushbu tanlov startaplarning to‘laqonli kompaniyalarga aylanishiga xizmat qiluvchi ekotizimni shakllantirishga yordam bermoqda.