Siz O‘zbekistondagi yosh startapchimisiz va global muvaffaqiyatni orzu qilasizmi? “UzVC” boshqaruvchi hamkori Maxsud Yusupov startapingizni xalqaro miqyosga olib chiqishga yordam beradigan 10 ta amaliy maslahat bilan o‘rtoqlashadi.

1. Foydalanuvchi har doim haq

Xalqaro bozorga chiqish murakkab jarayon bo‘lib, tajriba va tezkorlikni talab qiladi. Nafaqat mijoz ehtiyojlarini o‘rganish, balki boshqa asoschilardagi yutuq va xatolarni tahlil qilish ham muhimdir. Gipotezalar qanchalik tez tekshirilsa, shuncha ko‘p ma’lumot olish mumkin.

Ko‘pgina startaplarning muammosi mijozlar ehtiyojlarini tushunmaslik va ularning fikrini yetarlicha baholamaslikdir. Agar foydalanuvchi mahsulotning qiymatini ko‘rmasa, uni ayblamaslik kerak. Unga haqiqatan ham kerak bo‘lgan narsaga e’tibor qaratgan ma’qul.

2. Boshidanoq masofaviy ishlash uchun jamoa tuzing

Hozir hamma bir shaharda bo‘lsa ham, jarayonlar shunday tashkil etilishi kerakki, go‘yo xodimlar dunyoning turli burchaklaridan ishlayotgandek bo‘lsin. Bu aniq hujjatlashtirish, asinxron aloqa vositalaridan foydalanish va moslashuvchan qaror qabul qilishjarayonlarini o‘z ichiga oladi. Bunday yondashuv kengayishni va sayyoramizning turli burchaklaridan iste’dodlarni jalb qilishni osonlashtiradi.

3. Global muammolarni hal qiling

Muvaffaqiyatli startaplar universal vazifalarga e’tibor qaratadi. Mahsulotingiz nafaqat O‘zbekistonda, balki boshqa joylarda ham dolzarb bo‘lgan qanday muammolarni hal qila olishini o‘ylab ko‘ring. Bu yangi bozorlarga moslashishni osonlashtiradi va xalqaro investorlarning e’tiborini tortadi.

4. Diaspora kuchidan foydalaning

Xorijdagi o‘zbek diasporasi qimmatli resursdir. Ular yangi bozorlar xususiyatlarini tushunishga, foydali aloqalar o‘rnatishga va hatto birinchi mijozlar bo‘lishga yordam berishi mumkin. Yurtdoshlaringizdan yordam so‘rashdan uyalmang.

5. Kengaytiriladigan biznes modellarni tanlang

Ba’zi modellar xalqaro bozorlarga osonroq moslashadi. Masalan, SaaS yoki B2B yechimlar minimal mahalliylashtirish talab qiladi. Ular katta xarajatlarsiz tez kengayish imkonini beradi.

6. Do‘stona mamlakatda yuridik baza yarating

Xalqaro investorlar shaffof va barqaror yurisdiksiyalarni afzal ko‘radilar. Investitsiyalarni jalb qilishni osonlashtirish va manfaatlaringizni himoya qilish uchun startaplar uchun qulay sharoitlarga ega mamlakatlarda kompaniyani qo‘shimcha ro‘yxatdan o‘tkazish imkoniyatini ko‘rib chiqing.

7. Xalqaro akseleratorlarda ishtirok eting

“Y Combinator” yoki “Techstars” kabi dasturlar global tarmoqlar, mentorlar va investorlarga kirish imkonini beradi. Ularda ishtirok etish muvaffaqiyat ehtimolini oshiradi va startapning rivojlanishini tezlashtiradi.

8. Maqsadli mamlakatlarga tez-tez tashrif buyuring

Masofadan ishlash odatiy holga aylangan bo‘lsa-da, asoschining maqsadli bozorda bo‘lishi niyatlarning jiddiyligini ko‘rsatadi. Bu mahalliy madaniyatni yaxshiroq tushunishga, hamkorlar va mijozlar bilan ishonchli munosabatlar o‘rnatishga yordam beradi.

9. O‘z hikoyangizni so‘zlab bering

O‘zbekistondan ekanligingiz noyob afzallikdir. Global muammolarni hal qila oladigan mahsulot yaratishda mahalliy tajriba qanday yordam berganini o‘rtoqlashing. Samimiy hikoya e’tiborni tortadi va ishonch uyg‘otadi.

10. Xalqaro tajribaga ega jamoa tuzing

Xalqaro bozorlarda tajribaga ega bo‘lgan mutaxassislarni jalb qilish keng tarqalgan xatolardan qochishga yordam beradi. Ular qimmatli fikrlar beradi va yangi imkoniyatlar eshigini ochadi.

Ushbu tavsiyalarga amal qilsangiz, startapingizni xalqaro maydonga ishonch bilan olib chiqishingiz va global miqyosda muvaffaqiyatga erishishingiz mumkin.