Qozog‘istonda Digital Startup Awards (DSA) dasturining navbatdagi yarim final bosqichi bo‘lib o‘tdi. Ushbu tashabbus Markaziy Osiyodagi eng istiqbolli startap jamoalarini birlashtirib, ularni dekabr oyida Toshkentda o‘tadigan Grand Finalga boshlaydi. Tadbirda startap asoschilari, investorlar va ekotizim yetakchilari ishtirok etdi.

 

DSA 2025 yilgi mavsumida 350+ dan ortiq ariza qabul qilindi, ulardan 13 ta Qozog‘iston startapi sahnaga chiqib, o‘z g‘oyalarini taqdim etdi. Pich-sessiyalar yakuniga ko‘ra, ikki jamoa — Cyberpack va Multicode — Grand Finalga yo‘llanma oldi.

 

Cyberpack — maktablar uchun yagona STEAM ekotizimi bo‘lib, u muhandislik to‘plamlari, sun’iy intellektga asoslangan ta’lim platformasi va to‘liq metodikani birlashtiradi. Bu yechim STEAM ta’limini darsdan tashqari mashg‘ulot sifatida yoki K–12 uchun mustaqil fan sifatida joriy etish imkonini beradi.

 

Multicode — vagon parklarini boshqaruvchi kompaniyalar uchun yaratilgan B2B SaaS platformasi. U yuk tashishlarni yopish jarayonlari, rejalashtirish, analitika va xodimlar o‘rtasidagi o‘zaro hamkorlikni avtomatlashtiradi. Platforma transport kompaniyalariga yanada samarali va shaffof ishlash imkonini beradi.

 

Yarim final hakamlar hay’ati quyidagi ekspertlardan iborat bo‘ldi:

— Dalerkhon Nodirov, Deputy CEO, IT Park Ventures;

— Dimash Kassen, Senior Investment Associate, Astana Hub Ventures;

— Nargiza An, CEO, White Hill Capital;

— Pavel Koktyshev, CEO va hammuassisi, MOST Holding;

— Danabek Kaliazhdarov, CEO, Codiplay.

 

Cyberpack va Multicode endi Qozog‘iston nomidan Digital Startup Awards Grand Final bosqichida qatnashib, mintaqaning boshqa g‘oliblari bilan birgalikda $100,000 lik mukofot jamg‘armasi uchun bellashadilar.

 

Digital Startup Awards Markaziy Osiyo innovatsiya markazlarini birlashtirishda va yangi avlod tadbirkorlarini qo‘llab-quvvatlashda davom etmoqda. Grand Finalga sanoqli qadamlar qoldi — eng qiziqarli pallalar hali oldinda.