“Plug and Play Tech Center” tomonidan tashkil etilgan 4-bosqich akseleratsiya dasturi Toshkent shahrida rasman boshlandi. Mazkur tashabbus IT Park Uzbekistan hamkorligida va O‘zbekiston Raqamli texnologiyalar vazirligi ko‘magida amalga oshirilmoqda. Sinchkov saralash jarayonidan so‘ng 15 istiqbolli startap tanlab olindi. Ularning asosiy yo‘nalishlari fintech (moliyaviy texnologiyalar), korporativ yechimlar va sun’iy intellekt bo‘lib, ushbu 12 haftalik intensiv dastur doirasida ishtirokchilar bizneslarini kengaytirish hamda xalqaro bozorlarga chiqish imkoniyatiga ega bo‘ladilar.

 

 

Mazkur tadbir nafaqat yangi ishtirokchilar yo‘lining boshlanishi, balki netvorking, tajriba almashish va O‘zbekistonda innovatsion tadbirkorlik istiqbollari bo‘yicha muhokamalar uchun muhim platforma ham bo‘ldi.

 

Ekotizimni qo‘llab-quvvatlash va asosiy ma’ruzachilar

 

Soha yetakchilari startap ekotizimi, investitsiya imkoniyatlari va mavjud qo‘llab-quvvatlash dasturlari yuzasidan o‘z fikrlari bilan o‘rtoqlashdilar:

 

• Anastasiya Filippova, IT Park Uzbekistan Startaplar, venchur investitsiyalar va mahalliy IT-xizmatlarni rivojlantirish bo‘limi rahbari;
• Durdona Alimardonova, IT Park Uzbekistan Startap ekotizimi loyihalar menejeri, u asosiy startaplarni qo‘llab-quvvatlash tashabbuslarini taqdim etdi;
• Zaynab Atabaeva, “IT Park Ventures” investitsiya menejeri, u jamg‘armaning faoliyati va mavjud investitsiya imkoniyatlari haqida ma’lumot berdi.

 

4-bosqich ishtirokchilari

 

Yangi akseleratsiya bosqichi uchun 50 dan ortiq ariza orasidan 15 startap tanlab olindi. Dastur davomida jamoalar mentorlik yordami, biznesni kengaytirish strategiyalariga ega bo‘ladilar hamda 2025-yil 15-may kuni Toshkentda bo‘lib o‘tadigan “Plug and Play Uzbekistan Summit” tadbiriga tayyorgarlik ko‘radilar.

 

 

 

• UzbekVoice — “UzbekVoiceAI” o‘zbek tili uchun mo‘ljallangan nutqni matnga (STT) va matnni nutqqa (TTS) aylantirish bo‘yicha zamonaviy yechimlarni ishlab chiqaradi.
• Urbo — O‘zbekistondagi yetakchi ko‘chmas mulk platformasi bo‘lib, yangi qurilgan va ikkilamchi bozordagi ko‘chmas mulklarning keng tanlovini taklif etadi.
• Karmon AI — foydalanuvchilarga daromad, xarajat va kreditlarni kuzatish, shuningdek, moliyaviy savodxonlikni oshirishga yordam beradigan innovatsion moliyaviy boshqaruv ilovasi.
• 1DOC.UZ — yuridik hujjatlar bilan ishlash uchun yagona kompleks platforma: shablonlar yaratish, yuridik AI-yordamchisidan foydalanish, ma’lumotlarni raqamlashtirish, elektron imzo qo‘yish va hujjatlarni global tarqatish imkoniyatlarini o‘z ichiga oladi.
• Jett — kichik investorlarga masofadan turib hisob ochish, yetakchi kompaniyalarga sarmoya kiritish va fond birjasida qimmatli qog‘ozlar bilan savdo qilish imkoniyatini taqdim etuvchi O‘zbekistondagi birinchi startap.
• 4Rize — banklar va fintech kompaniyalari uchun tadqiqot platformasi bo‘lib, moliyaviy texnologiyalar sohasidagi real foydalanuvchilar tajribasi bo‘yicha saralangan ma’lumotlar bazasini taqdim etadi.
• pDaftar — qarzlarni kuzatish va to‘lash uchun qulay mobil ilova bo‘lib, avtomatik eslatmalar, bir nechta savdo nuqtalarini boshqarish va kontaktlarni mijozlarga aylantirish funksiyalariga ega.
• Trust ID — fotosuratlarni tekshirish, “jonli mavjudlik” belgilarini aniqlash va shaxsni tasdiqlash uchun identifikatsiya tizimi.
• MilliyPay — Rossiyadan O‘zbekistonga tez va xavfsiz pul o‘tkazmalarini amalga oshiradi, UzCard, HUMO, VISA kartalarini qo‘llab-quvvatlaydi, shuningdek, kommunal xizmatlar, mobil aloqa, internet va boshqa xizmatlar uchun to‘lovlarni amalga oshirish imkonini beradi.
• Bito — kichik, o‘rta va yirik biznes uchun mo‘ljallangan ERP (Enterprise Resource Planning) tizimi.
• Robosell — barcha zarur xizmatlarni yagona yechimda birlashtirgan holda onlayn biznesni yo‘lga qo‘yish uchun innovatsion platforma.
• Cradle AI — chakana savdo, banklar va ta’lim muassasalari uchun tashrif buyuruvchilar va xodimlarni tahlil qilish hamda xodimlar va talabalarning davomatini hisobga olish tizimlarini avtomatlashtirish uchun kompyuter ko‘rish yechimlarini taklif etadi.
• Neural Payments — blokcheyn va steyblkoinlardan foydalangan holda sun’iy intellektga asoslangan moliyaviy infratuzilmani ishlab chiqmoqda. Bu tizim tezkor transchegaraviy to‘lovlar va sun’iy intellekt tizimlari o‘rtasidagi tranzaksiyalar uchun mo‘ljallangan.
• Payzor — MENA mintaqasi mamlakatlari uchun innovatsion P2P kreditlash platformasi.
• AIsha AI — qo‘ng‘iroqlar yozuvlarini tahlil qilish orqali samaradorlik haqida batafsil hisobotlarni taqdim etadigan koll-markazlari faoliyatini avtomatlashtiruvchi sun’iy intellektga asoslangan platforma.

 

 

Soha yetakchilari fikrlari

 

“Biz ushbu 4-bosqich akseleratsiya dasturida ishtirok etayotgan startaplarni katta mamnuniyat bilan qutlaymiz. Mazkur dastur ularga O‘zbekistonda va undan tashqarida o‘z bizneslarini kengaytirish hamda muvaffaqiyatga erishish uchun zarur bo‘lgan resurslar, murabbiylik va aloqalarni taqdim etadi. Bu bosqich fintex, korporativ yechimlar va sun’iy intellekt kabi sohalar kelajagini shakllantiradigan innovatorlarning yangi avlodini o‘zida mujassam etgan. IT Park bilan hamkorlikda ularning rivojlanishini qo‘llab-quvvatlash va to‘liq salohiyatini ro‘yobga chiqarishga ko‘maklashishga intilamiz. O‘zbekiston innovatsiyalar sohasida global yetakchiga aylanish salohiyatiga ega va biz ushbu jarayonning bir qismi ekanligimizdan faxrlanamiz” — Alfredo Gomez Soria, "Plug and Play" korporativ hamkorlik bo‘yicha katta menejeri.

 

 

“Innovatsiya — bu faqat texnologiya emas, balki dadil g‘oyalar rivojlanishi uchun imkoniyatlar yaratishdir. ‘Plug and Play’ bilan hamkorlik orqali O‘zbekiston startaplarning o‘sishini tezlashtirmoqda va mamlakatning texnologik ekotizimini mustahkamlamoqda. Ushbu yangi bosqich startaplari sanoatda o‘zgarishlarni amalga oshiradi, investitsiyalarni jalb qiladi va yangi imkoniyatlar yaratadi”— Abdulahad Kuchkarov, IT Park Uzbekistan bosh direktori.

 

3-bosqich bitiruvchilari

 

Yangi startaplarni qabul qilish bilan birga, tadbir doirasida 3-bosqich bitiruvchilari ham taqdirlandi. Dasturni 17 ta startap muvaffaqiyatli tamomlab, endilikda bizneslarini kengaytirish va investitsiyalar jalb qilish yo‘lida muhim bosqichga qadam qo‘ymoqda.

 

SynCall AI, Datagaze LLC, VOLTIVA, TrustMe.kz, Sharh (Cometa Group), Mars IT School, ISH.UZ, GrowyMe, ZebraEye, TPM Solutions, exode, Sampler.az, Global Green Hub, Pulberry (Flex Soft LLC), medevery, Dialix, Kharezmi-Tech.

 

“Plug and Play” akseleratsiya dasturi IT Park Uzbekistan bilan hamkorlikda faqatgina alohida startaplarni qo‘llab-quvvatlash bilan cheklanmaydi, balki O‘zbekistonning keng ko‘lamli raqamli transformatsiyasin jadallashtiruvchi omil hamdir. Mahalliy tadbirkorlarni rivojlantirish va ularga muvaffaqiyatga erishish uchun zarur vositalarni taqdim etish orqali, bu tashabbus O‘zbekistonning uzoq muddatli iqtisodiy barqarorligi va texnologik raqobatbardoshligiga hissa qo‘shadi.

 

Buning natijasida O‘zbekiston barqaror o‘sish va global hamkorlikni ta’minlaydigan rivojlangan tadbirkorlik ekotizimiga ega bo‘lgan faol texnologiya va innovatsiyalar markaziga aylanmoqda. O‘zbekiston Markaziy Osiyoning yetakchi texnologiya va innovatsiya markaziga aylanish yo‘lida ilgarilab borar ekan, “Plug and Play” kabi dasturlar IT Park Uzbekistan bilan birgalikda mahalliy iste’dodlar va jahon bozorlari o‘rtasida ko‘prik vazifasini o‘tab, yangi iqtisodiy imkoniyatlarni ochadi va barqaror o‘sishni ta’minlaydi.