O‘zbekistonlik texnologik kompaniya OX Group IT Park Ventures va United Ventures venchur fondlaridan investitsiya jalb qildi. Jalb qilingan mablag‘larning umumiy hajmi 900 ming AQSh dollarini tashkil etib, shundan 400 ming dollari IT Park Ventures hissasiga to‘g‘ri keladi.

Mazkur mablag‘lar kompaniyaning IT-infratuzilmasini rivojlantirish, texnologik stekni takomillashtirish hamda Markaziy Osiyo bozorlaridagi ishtirokini kengaytirishga yo‘naltiriladi.

OX System — ritail avtomatlashtirishga yo‘naltirilgan startap platforma

OX Group’ning asosiy startap mahsuloti — OX System platformasi bo‘lib, u xaridlar, ombor hisobi va savdo nuqtalari o‘rtasidagi jarayonlarni avtomatlashtirish uchun mo‘ljallangan. Platforma ma’lumotlarni yagona tizimda jamlaydi hamda biznesning asosiy samaradorlik ko‘rsatkichlarini real vaqt rejimida kuzatish imkonini beradi.

OX System arxitekturasi turli bozor segmentlari uchun moslashtirilgan maxsus modullarni o‘z ichiga oladi:

• Chakana va ulgurji savdo — narxlarni boshqarish, fiskal operatsiyalar va B2B hisob-kitoblar uchun vositalar
• FMCG sektori — mahsulotlarning yaroqlilik muddatini nazorat qilish va og‘irlik asosidagi tovarlarni boshqarish funksiyalari
• Maxsus ritail — gullar biznesi kabi sohalar uchun murakkab mahsulot birliklarini hisobga olishni avtomatlashtiruvchi yechimlar
• E-commerce — yagona ma’lumotlar bazasida ombor qoldiqlari bilan sinxronlashtirilgan onlayn vitrinalar yaratish vositalari
• Hisob-kitob texnologiyalari — inventarizatsiya jarayonlarini optimallashtirishga qaratilgan RFID asosidagi yechimlar
  
  

Strategik rivojlanish yo‘nalishlari

Keyingi rivojlanish bosqichida OX Group to‘plangan ma’lumotlar asosida iste’molchi talabini prognozlashga yo‘naltirilgan prediktiv analitika vositalarini joriy etish ustida ish olib bormoqda. Venchur fondlar bilan hamkorlik kompaniya tomonidan MENA va Sharqiy Yevropa bozorlariga chiqishga tayyorgarlik bosqichi sifatida baholanmoqda.

OX Group strategiyasi logistika, marketing va to‘lov jarayonlarini yagona platforma doirasida birlashtiruvchi integratsiyalashgan texnologik muhit yaratishni nazarda tutadi.