Qirg‘izistonda Digital Startup Awards (DSA) dasturining navbatdagi yarim final bosqichi bo‘lib o‘tdi. Ushbu xalqaro tashabbus Markaziy Osiyodagi eng kuchli startap jamoalarini birlashtirib, mintaqaning innovatsion salohiyatini namoyish etmoqda. Tadbir dekabr oyida Toshkentda o‘tadigan Grand Final oldidan muhim bosqich bo‘ldi.

 

DSA musobaqasida bu yil 350+ dan ortiq ariza qabul qilindi va 7 ta Qirg‘iziston startapi o‘z loyihalarini hakamlar hay’ati oldida taqdim etdi. Pich-sessiya natijalariga ko‘ra, ikki jamoa — OptimTrade va Promconsulting — g‘olib deb topilib, Qirg‘iziston nomidan Grand Finalda ishtirok etish huquqini qo‘lga kiritdi.

 

OptimTrade — savdo faoliyatidagi operatsion jarayonlarni optimallashtiruvchi va avtomatlashtiruvchi onlayn SaaS platformasi. U kompaniyalarga biznes jarayonlarini tezlashtirish, xatolarni kamaytirish va savdo operatsiyalarini samarali boshqarishda yordam beradi.

 

Promconsulting — kichik va o‘rta biznes uchun sun’iy intellektga asoslangan avtomatlashtirish platformasi bo‘lib, chatbotlar, CRM, onlayn yozilish, analitika va moliyaviy boshqaruvni yagona yechimda birlashtiradi. Platforma tadbirkorlarga kundalik jarayonlarni raqamlashtirish va samaradorlikni oshirish imkonini beradi.

 

Yarim final hakamlar hay’ati quyidagilardan iborat bo‘ldi:

- Behzod Abdullayev, IT Park Ventures investitsiyalar bo‘yicha menejeri;

- Jazgulu Rayimbekova, "Highland Capital" kompaniyasining investitsiya direktori;

- Gulzat Ergeshova, "Yuqori texnologiyalar parki"ning kelajak ekotizimlarini rivojlantirish bo‘yicha yetakchi menejeri.

 

Tadbir Qirg‘iziston Raqamli rivojlanish vazirligi, IT Park Uzbekistan, IT Park Ventures, Startupbase, Digital Startup Awards, Accelerate Prosperity va High Technology Park Qirg‘iziston hamkorligida tashkil etildi.

 

OptimTrade va Promconsulting endi Qirg‘iziston nomidan Digital Startup Awards Grand Final bosqichida qatnashib, $100,000 lik mukofot jamg‘armasi uchun mintaqadagi boshqa g‘oliblar bilan bellashadi.

 

Digital Startup Awards Markaziy Osiyo innovatsiya markazlari o‘rtasidagi hamkorlikni kuchaytirishda va mintaqa raqamli kelajagini shakllantirayotgan yangi avlod asoschilarini qo‘llab-quvvatlashda davom etmoqda.