O‘zbekistonlik tadbirkorlar jahon texnologik landshaftida tobora ko‘proq iz qoldirmoqda. Bu hafta o‘zbekistonlik asoschilar ishtirokidagi ikkita startap - CoRun.ai va Humanola muhim investitsiya raundlarini e’lon qildi, bu esa o‘zbek iste’dodlarining Silikon vodiysi va undan tashqarida mavjudligini yanada mustahkamladi.

 

CoRun.ai $3,5 million seed investitsiya oldi (baholash: $17,5 million)

 

O‘zbekistonlik Nodir Ruzmatov hammuassis bo‘lgan CoRun.ai kompaniyasi $3,5 million seed-raundni yopdi. Investitsiya Access Capital Management, Silicon Valley angel investorlar va logistika sohasi mutaxassislari tomonidan boshqarildi.

 

CoRun.ai — avtomobil parklarini boshqarish uchun AI asosidagi yagona intellektual platforma. Mijozlardan olingan tasdiqlangan ma’lumotlarga ko‘ra:

 

— yoqilg‘i xarajatlari 10,2% ga kamayadi,

— texnik xizmat ko‘rsatish xarajatlari 12,8% ga qisqaradi,

— haydovchilar uchun AI-trening orqali avariyalar va sug‘urta xarajatlari pasayadi.

 

Startapning eng innovatsion yo‘nalishlaridan biri — AI asosidagi Captive Insurance modeli bo‘lib, u parklar uchun o‘z xavfini boshqarish va tejalgan xarajatlarni moliyaviy foydaga aylantirish imkonini beradi.

 

Access Capital Management’ning boshqaruvchi hamkori Toni Chen ta’kidladi: “CoRun.ai operatsion intellekt uchun yangi standart yaratmoqda. Ularning nemis muhandisligi aniqligi va Silicon Valley AI yondashuvining uyg‘unligi platformaning samaradorligini oshiradi.”

 

Hammuassis Nodir Ruzmatov qo‘shimcha qildi: “O‘zbekistonlik AI mutaxassislarining global innovatsiyalarga hissa qo‘shayotgani bilan faxrlanamiz. Kelajakda Silicon Valley’da O‘zbekiston ildiziga ega unicornlar ko‘payishini istayman.”

 

Humanola masofadan boshqarilishi mumkin bo‘lgan robotlarni rivojlantirish uchun $2,5 million jalb qilmoqda

 

Humanola startapi $2,5 million seed-raundni yopdi. Asosiy investor — Link Ventures (Boston). Asoschilar — Sanjar, Akbar va Zhaoyuan — odamga masofadan turib robotni boshqarish imkonini beruvchi texnologiya yaratmoqda. Kelajakda O‘zbekistonda o‘tirgan mutaxassis AQShdagi zavodda ishlayotgan robotni boshqarishi, yoki xavfli laboratoriya ishlarini robot orqali bajarishi mumkin bo‘ladi.

 

AI va robototexnika bozori kelajakda trillion dollarlik qiymatga ega bo‘lishi prognoz qilinmoqda. Humanola’ning investitsiya olishi o‘zbekistonlik yoshlarning deep tech sohasidagi ishtiroki kuchayayotganini ko‘rsatadi.

 

Ayrim o‘zbekistonlik asoschilarga ega kompaniyalar AQSh venchur fondlaridan investitsiya jalb qilayotgani — O‘zbekiston texnologik salohiyatining xalqaro miqyosda tan olinayotganidan dalolat beradi.