IT Park Uzbekistan startaplar bilan ishlaydigan mutaxassislarni tayyorlashga qaratilgan Treking dasturiga qabul boshlanganini e’lon qiladi. Dastur startap jamoalariga g‘oyadan barqaror rivojlanish bosqichigacha tezroq yetib borishga yordam beradigan trekkerlarni tayyorlashni maqsad qilgan.

 

Trekker — bu startap jamoasiga mahsulot yoki biznes modelidagi asosiy cheklovlarni aniqlash, to‘g‘ri gipotezalarni shakllantirish hamda loyihaning keyingi rivojlanish bosqichlarini belgilashda yordam beradigan mutaxassis. Bunday ekspertlar dunyo bo‘ylab akseleratorlar va inkubatsiya dasturlarida faoliyat yuritadi.

 

Ushbu Treking dasturi Prezidentning startaplarni qoʻllab-quvvatlashning kompleks ekotizimini joriy etish chora-tadbirlariga oid qarori (PQ-59) doirasida tashkil etilmoqda.

 

Dastur texnologik kompaniyalar qanday rivojlanishi va startaplar bilan ishlash jarayonini chuqurroq tushunishni istagan mutaxassislar uchun mo‘ljallangan.

 

Dastur doirasida 100–120 nafar mutaxassis tayyorlash rejalashtirilgan. Keyinchalik ular IT Park Uzbekistan tashabbuslari doirasidagi startap dasturlarida ishtirok etib, startap jamoalari bilan ishlash imkoniyatiga ega bo‘ladi.

 

Treking dasturi quyidagi toifadagi ishtirokchilar uchun foydali bo‘lishi mumkin:

 

• tadbirkorlik tajribasiga ega shaxslar;
• IT-kompaniyalardagi prodakt-menejerlar va mutaxassislar;
• biznesni rivojlantirish bo‘yicha konsultantlar va ekspertlar;
• universitetlar, texnoparklar, innovatsion markazlar, akseleratorlar va venchur fondlari vakillari;
• startaplar bilan ishlayotgan yoki ushbu yo‘nalishda faoliyat boshlamoqchi bo‘lgan mutaxassislar.

 

Dastur davomida ishtirokchilar startaplarni rivojlantirishning asosiy vositalari bilan tanishadi. Jumladan, Customer Development, MVP bilan ishlash, HADI-sikllar, startap diagnostikasi hamda biznes-modellar tahlili bo‘yicha bilim va amaliy ko‘nikmalar beriladi.

 

Agar siz startaplarni rivojlantirish jarayonida ishtirok etish va ekotizimda shakllanayotgan ekspertlar hamjamiyatining bir qismiga aylanishni istasangiz, ushbu dastur yaxshi boshlang‘ich nuqta bo‘lishi mumkin.